Om kunstverket
«Nittenhundre-steinen» står i vegkrysset nedanfor Norheim-garden. Då den nye bygdevegen mot Undheim i året 1900 nådde Norheim, vart det reist ein stein i krysset der vegen deler seg, og etter den tid heiter staden 1900-krysset.
Eit stort vegprosjekt vart gjennomført kring førre århundreskiftet i Time, og hovudvegen mellom Garborg og Kverneland var ferdig år 1900. Vegen vart forlenga til Nærbø og Varhaug stasjon i 1913 og 1923. Men heile dette prosjektet var ikkje ferdig før i 1935, då vegen endeleg vart forlenga frå Kvernelands fabrikk og nordover til Ganddal stasjon. Denne vegen avløyste den gamle Øvre Jærvegen frå ca. 1820. Denne vegen gjekk frå Åse i Ganddal via Orstad, med bru over Figgjoelva. Så via Frøyland/Kverneland til Njå, Time, Fosse og Mossige.